أنا للي كنعزف
العود مع الفرقة الموسيقية..قلتلو يا سلام!.. سمعت بللي راكم مأسسين فرقة..قالي وي..قلتلو
كون ماقلتيهاليش دابا..كاع مكنت غادي نتيق "با الحسين"..(بقا مستغرب قالي
شكون با الحسين ؟!..قلتلو "الطرارة"..بقا كيضحااك ههههه..قالي خلاااص هههه)..
قالي فعلا الفرقة كاينة و حاضرة ف اي نشاط او حفل soi كان د المرضى او الموظفين..ممكن تحضر معانا ف التدريبات..وسممعنا
شوية في "الكتارة"..قلتلو مرحبا هه..وعجبني الحال الصراحة..كملي الحسانة
عجباتني زوينة..قلتلو السي "مصطفى" نتا فنان ماشي غي ف العود..حتى ف اللمسة
د الحلاقة..قالي هادا كان الحلم ديالي من الصغر ديالي وهو انني تكون عندي مدرسة د الحلاقة..وراني
فعلا خدام على هاد المشروع باش نحقق الحلم على ارض الواقع..كنتسنا غي شي فلوس يجيوني..
حقي دالورت للي خلا الوالد..كون ساعفاتني الضروف كون درت هاد المشروع شحال هادي..ولكن
الوقت صعيبة..كيهدر معايا وباينة دوز التكرفيس وتمارة فصغرو..وبدا كيعاودلي قالي من
بعد ما اخديت الباكولوريا ديالي وقبل مندير التمريض..خرجت نخدم..ندبر على راسي ماخليت
فين خدمت..واخا الوالد كان ميسور الحال نسبيا..ولكن انا نفسي حارة..وخصني نعتامد على
راسي..ونحقق داتي بداتي..خرجت خدمت ف معمل دالياجور..من بعد اخدمت ف مخبزة..وحيت كان
راسي خفيف دغيا كنتعلم الصنعة..لقيت بزاف دالعراقل فديك المخبزة بسباب الغيرة والحسد
ديال شي وحدين كانوا خدامين تما قبل مني..وبقاو كيديرولي المشاكل..يزيدولي الملحة ف
العجينة..يزيدو ف النار ديال الفران باش تحرق الخبز.. الخ..حتى واحد النهار نوضتها
معاهم صباط تما..كليتهم بالعصا واخا بغاو يتحاماو..كنت صغير وصحيح..ماشي كما كتشوفني
دابا..طيحت شوية هههه..واخا هاكاك باقي الفانت ابا عادل هههههه...من بعد هزيت صاكي
ومشيت كنقلب على خدمة اخرى..بقيت كنبيع ونشري..خدمت مزيان..حتى واحد المرة مشيت جبت
السلعة من الشمال..وداوهالي الدوانة فالطريق..كرهت البيع والشرا..الى ماكانش عندك راسمال
صحيح ..التجارة ماتعطيكش فهاد البلاد..بقا كيعاودلي كيعاودلي بحال الازليات..عرفت بللي
راكم تجريبة كبيرة ف الحياة من بعد هاد الضروف للي دوز..ومع دلك باقي ماتخلا على الحلم
ديالو..قلتلو تبارك الله عليك اسي مصطفى هادشي للي كتعاودلي كيعطيني طاقة باش نزيد
القدام فحياتي..ونتا مادام كدير الخير ف المرضى وكتعطي ف هاد الحياة..حتى الكون غادي
يرد عليك ويعطيك كتر بدون مقابل..ومادام نتا مصمم باش تحقق الحلم ديالك..الكون غادي
يحقق ليك الامنية ديالك..قلتلو واش عمرك سمعتي بقانون الجذب la
loi d'attraction..قالي
لا..الصراحة اول مرة كنسمع بيه..قلتلو انا غادي نشوف با الحسين واش عندو ف الخزانة
شي كتاب كيهدر على هاد الموضوع..ونجي نشرحلك مزيان..وغالبا غادي يكون عندو..حيت بانتلي
موسوعة عندو تما..بقينا كندردشو وكنهدرو..وهو كيحسن لمرضى اخرين..يكون دوز شي 30 مريض
ديك الصباح..قلتلو الصراحة الحديت معاك شيق السي مصطفى..وستافدت منك بزاف..انا حاس
براسي مرخي وفيا النعاس غادي نمشي ندوش ونعس ف البيت ديالي الجديد مع با الحسين.. قالي
حتى انا ساليت الحلاقة..قالي تهلا فراسك الى احتاجيتي اي حاجة انا هنا.. قلتلو عندي
واحد الملاحضة..قالي شناهي قلتلو كتشبه لاعب دالكورة ROBBEN ههههه شكلا ومضمونا..حتى ف روح القتالية وتحربين
ديالو فوسط الملعب...قالي خلااااااص!ههههههه..
منبعد ما دوشت
خرجت كنشوف التصرفات دالمرضى..وكنحاول نتأقلم مع الجو..مشيت البيت ديالي الجديد العالم
للي اعجبني..با الحسين فقنت او انا فقنت..خديت الكتاب ديال( la loi de
l'attraction les clés du secret pour obtenir ce que vous désirez)..بقيت كنقرا فيه..داني نعاس..حليت
عيني لقيت الضلام..داني النعاس بزاف..شفت من السرجم بانلي شي خيال..شي واحد لابس البيض
كيمشي بزربة وكيرجع..خفت تخلعت انا تزعزعت..قلبي بقا كيضرب كيضرب..وكنعيط "با
الحسين!".."با الحسين!!"..ناض با الحسين مخلوع..شعل الضو دالبيت..جا
كيجري عندي..قالي ياك لاباس اولدي!!..قلتلو واش السبيطار مسكون؟؟!..قالي علاش؟!.. ويديه
كيترعدو..قلتلو شي واحد لابس لبيض كيمشي ويجي بزربة حدا السرجم........يتبع..
ب.س: اي تشابه
للشخصيات الخيالية مع شخصيات حقيقية في اي مستشفى سيكون فقط محض الصدفة
إعداد هشام دندن عن صفحة الصحة النفسية بالدارجة