...قالي "عادل" غي ارتاح راك بيخير..وابتسم معايا وقالي"
واش عارف راسك فين نتا؟"..مقدرتش نجاوب ولانهدر..حركت راسي هاكا وهاكا، فهم هو
بللي كنقولو لا!..قالي "راك فسبيطار(مستشفى الأمراض العقلية والنفسية)،راك هنا
فأمان..هنا غادي تعالج من الأعراض للي جاوك..أنا متيقتش شنو كنسمع! كفاش؟! أنا فسبيطار
د الحماق!! فهاد اللحضة أفكاري للي مخربقين وكيهربولي زادو تخربقو..والاصوات للي فودني
تزادو!..قدرت نطق ولكن صوتي خافت وقليل، وقتلو أنا باغي نمشي بحالي..باغي نمشي لدارنا
عند خوتي والوالدة..باغي نمشي عند" إسراء"،جاوبني قالي غادي تخرج بحالك إن
شاء الله وغادي تشوف عائلتك ولكن حتى تعالج من المرض ديالك أسي "عادل
"..وضحك معايا وقالي شكون هي بعدا "إسراء " العفريت ههه؟! الليل كامل
وانتا كتنطق بسميتها!.. جاتني الضحكة وبتسمت بزز..وحسيت بحلقي ناشف..فيا العطش..فيا
الجوع..ومازال مامتيقش راسي اش كندير انا فهاد السبيطار! أنا ماشي حمق!!.
واحد الشوية جاو
2 ممرضين أخرين شافو فيا، قلبولي راسي واش سخون..قلبولي يدي واش كاين شي أتر د الصماطي..سولتهوم
علاش انا مربوط؟! قالولي حيت كنتي فواحد الحالة خطيرة بزاف..حالة هيجان حاد..للي كان
ممكن تآدي راسك وتآدي عائلتك وتآدي الناس للي فالمحيط ديالك وبلا ماتحس!..حنا دابا
غادي نفسخولك الصماطي ونعطيوك تشرب ونديوك دير شي دوش سخون،ونعطيوك حوايج جداد تلبسهوم،هاد
الحوايج للي لابس راه تقطعولك البارح فاش كنتي فديك الحالة.. أنا هاد الهدرة كاملة
للي قالو مادخلاتليش راسي ولكن قلتلهوم واخا اوكي..غي فسخولي!
فسخولي دوك الصماطي..وكلسوني
فالنموسية..حسيت بالدوخة..قالولي هاد الدوخة عادية،هاداك غي التأتير ديال المهدئات
للي درنالك البارح..عادي..غادي نعبرولك الطونسيون و نعطيولك الدوا للي غادي يحيدلك
هاد الدوخة. واحد اللحضة وقفت بلامانشعر..شفت فواحد الممرض وجاني صوت خاايب فودني قالي"
هادا غي كيتفلا عليك!!..هادا شيطان باغي يآديك!!..شفت فيه بانلي وجهو بحال شي جن..وقرون
حومر خارجينلو فوق راسو..داك الصوت قالي هادا شيطان جاك بصفة إنسان!!..شيطان للي باغي
فيك الشر! بالي بيه قبل مايبالي بيك!!.. ماحسيتش براسي حتى ضربتو ببونية لوجهو..بغيت
نزيد نضربو..بغيت نزيد نكمل عليه..بغيت ندافع على راسي من الادى ديالو..مانكدبش عليكوم،
كون لقيت شي موس كون قتلتو..حسيت بخوف رهييب! الشيطان للي كنسمع بيه لقيتو واقف قدامي..وجاي
باغي يأديني..! تبكي مو وماتبكيش مي !! .. فديك اللحضة لقيت يدي ب 2 مشدودين مرة اخرى..درت
لقيت 2 د السيكوريتي شاديني.. قالي الممرض هادي هي الحالة للي جاتك البارح!..وعلا هادشي
باش درنالك الصماطي فيديك..قتلو ولكن واش ماكاتشوفوش!! الشيطان جا عندي واقف قدامي
خصني نضربو باش يبعد مني!!.. قالي لا!..هادو غير تهيئات..الأعراض دالمرض ديالك كيعطيك
هادشي..هادشي للي كتسمع وكتشوف ماشي حقيقي!..غي اوهام وتهيئات..الصوت للي سمعتي ماشي
حقيقي..والشيطان للي شفتي ماشي حقيقي!..وانت هنا فهاد السبيطار باش نعالجوك..ونعطيوك
الدوا اللي غادي يعاونك باش تخلص من هادشي!..أنا فلول ماتيقتش آش كيقول..ولكن شفتلو
فعينو..فالملامح ديالو..حسيت بللي هو صادق معايا..وبللي هو ماعندو حتى مصلحة باش انه
يكدب عليا..وتقت فالهدرة للي قالي.
قاللي غادي تبعني
واي حاجة شفتيها اوسمعتيها اوجاتك فراسك سولني وانا غادي نقولك واش بصح او كيتهيأ ليك..قولتو
اوكي!.
مشيت معاهم للدوش..عاونوني
باش نغسل..عطاوني الشمبوان والصابون..يدي باقين مرخيين..ولكن هما للي عاونوني..عطاوني
حوايج جداد..لبسوهوملي حسيت بالراحة..داوني لبيت آخر..ناموسية أخرى..مخدة..مانطا..
عطاوني كاس دالما..شربت..حلقي باقي ناشف..زادوني كاس آخر دالما..عطاوني عصير..حيت ماقادرش
نمدغ او نبلع..
قالي دابا واش
مرتاح؟؟..قولتلو وي..ولكن مازال ماعارفش علاش أنا هنا!..وشحال دالوقت غادي ندوز هنا؟..والهدرة
للي قولتيلي بللي هادشي للي كنسمع غي تهيئات مازال مامقتنعش بيه..ومازال مادخلي راسي..ولكن
السؤال للي جاني فراسي دابا هو كفاش كنت كالس فالقهوة كنبريباري مع "إسراء"..حتى
لقيت راسي هنا..هادي هي اللقطة اللي مابغاتش تفهملي..وشنو وقعلي بالضبط؟!.. قالي دابا
حاول تنسا عليك هادشي كاامل..وآجي معايا نتمشاو شوية فالجردة ..الصباح زوين والشميشة..يدور
فيك شوية ديال الدم..وتشم الهاوا واحد 15 لدقيقة باش ندخلو عند الطبيب للي مشرف على
الحالة ديالك..وهو غادي يزيد يشرحلك شنو وقعلك..وغادي يهدر معاك باش يعرف بالضبط شنو
عندك..ويخرجلك الدوا اللي غادي تبعو باش يحيدلك هاد الاعراض..والاوهام والاصوات للي
كيجيوك..قولتلو ok!
خرجني الممرض للجردة..واحد
الجردة كبييرة..فيها بزاف د الناس..قتلو شكون هاد الناس!؟..قالي هادو ناس ناعسين فالسبيطار
كيتعالجو..هادو مرضى..
شفت واحد المنضر
اول مرة كنشوفو فحياتي..منضر غريب..شي غادي شي جاي..شي كيهدر بوحدو..شي كيضحك بوحدو..شي
كيضور فبلاصتو..شي وحدين مجموعين كيكميو كيتناوبو على كارو واحد..أنا فديك اللحضة جاني
احساس بالخوف..اول مرة كنسول راسي واش كاين شي ناس بحال هاكا؟!..جاتني البكية..حيت
لقيت راسي وسط منهوم..واش انا بحالهوم؟..واش أنا حماقيت؟!..مشا كولشي؟!..مشات القراية..مشا
الطموح ديالي باش نولي مهندس "ادي الدنيا " (كما كانت كتقوللي الوالدة..
الوالدة!! عاد تفكرتها مسكينة دابا..).. مشا الحلم ديالي باش نتزوج "بإسراء"..مشا
كولشي؟؟!.
بقيت كنشوف فداك
المنضر..كنشوف سور عالي..فرق كبير بين العالم للي على برا..وهاد العالم للي كنشوف..
كنشوف حراس الامن واقفين حدا السور وحاضيين..
قالي الممرض اجي
ارتاح فهاد الكرسي.. كراسا طوااال ومغروسين فالارض باش مايحركهوم حتى واحد....كلست
كنشم الهاوا..وبقيت ساهي..كنشوف هاد العبتية دهاد الحياة!!
بقيت سااهي..حتى
لقيت واحد السيد جا كلس حدايا..لابس نقي..عطاني كارو..قالي هاك اصاحبو واش كتكمي؟..قلتلو
وي!..شديت منو كارو وقلتلو شكرا!..قالي "لاشكر..أنا كيعيطولي "طارارا"
حتى انا مريض هنا.. الى حتاجيتي اي حاجة انا
هنا..درت كارو فومي..تفكرت ماعنديش بريكة باش نشعل..شافني واحد السيكوريتي فيهوم كنقلب
على الشعلة..جا شعلي كارو ومشا.. جا عندي "طارارا" قالي هاد السيكوريتي قديم
فهاد السبيطار..وعندو خبرة كبيرة..و كنعيطولو "الملالي"......يتبع...
إعداد هشام دندن عن صفحة الصحة النفسية بالدارجة