حليت عيني بزز،
كنشوف شوية د الضبابة وشوية دالبيوضة الفوق، كنزيد نحل عيني وكيتسدو..كنحاول نفتحهوم
مزيان..ماقادرش،بديت كنقاوم،حليت عيني هاديك البيوضة ديال السقف..وواحد السرجم على
ليمين ديالي كنشوف حداه من الجهة لوخرى ناس غاديين جايين وكيهدرو، ماقادرش نميز الملامح
ديالهوم،عيني تقاال بالنعاس..حاس بالجسم ديالي مرخي وتقييل..بغيت نوض ماقادرش..بغيت
نحرك يدي ورجلي ماقادرش.. دورت راسي على ليسر كنشوف ناموسيات مخربقيين وشي رجال يكونو
شي 5 بيهوم كيتغاوتو بيناتهوم ومجموعين دايرين الراس حدا الراس كايدابزو على شي حاجة
وكل واحد باغي ياخد حقو منها، حتى سمعت واحد فيهوم قالهوم "والله لا كماه شي واحد"
تما عرفت بللي كايدابزو على كارو (سجارة)، .. وتفكرت فديك اللحضة الكارو ديالي، البكية
ديالي ماعرفت فين درتها..كنتفكر اخر مرة شفتها كانت فوق الطبلة فالقهوة للي كنبريباري
فيها الدروس، كانت معايا " إسراء" الزميلة ديالي فكلية الهندسة اللي كانت
ديما كتنصحني باش نقطع الكارو وكتقولي "حيد عليك هاد الويل راه ماصلاحلك الوالو
غي غادي يزيد يكمل عليك ويضرك فصحتك.."
هادالاهتمام ديالها
بيا وبصحتي كان كيخليني نكون ديما معجب بيها ونقدر نكون كنبغيها ولكن منقدرش نقولها
ليها ولا نصارحها بالمشاعر ديالي.. وماقادرش حتى نصارحها بللي كنكمي حتى الحشيش للي
بلا بيها منقدرش نعس ومنقدرش ركز فقرايتي ومنقدرش نتحكم فأقوالي وأفعالي..الحشيش هي
مصدر السعادة ديالي هي و "إسراء" بلا الوجود ديالهوم ب 2 منقدرش نعيش مرتاح
او نكمل حياتي عادي..
رجعت حليت عيني..بغيت
غي النوض نعرف فين أنا..مقدرتش نحرك يدي، دورت راسي لقيت الصماطي فيدي..شفت فرجلي لقيت
صماطي أخرين شادينلي رجلي..عرفت راسي بللي أنا مربوط فنموسية..ولكن علاش؟؟ و كفاش؟؟
وفين أنا؟؟ بزاف ديال الافكار كيدورولي فراسي بسرعة( 1000 km/ فالساعة)، صوت كيديرونجيني كنسمعو
فودني كيعيطلي بسميتي "عادل" نوض..عادل! فيق ! كنسمع أغاني كيدوزو فودني
بسرعة خيالية..اصوات مزعجة فراسي للي مقادرش نتحملها..حاس براسي فالجحيم..مافاهم والو..سديت
عيني باش رتاح..باش نعس ونهرب من ديك الاصوات..نتهنا من الصداع للي عندي فراسي وودني.
حتى حسيت بواحد
اليد كتقلبلي راسي..كتقلبلي يدي..حليت عيني لقيت واحد السيد لابس طابلية بيضة..كنضن
بللي راه طبيب او ممرض..عرفت راسي بللي أنا ف سبيطار ولكن علاش أنا مربوط بصماطي علاش
ناس غادية جاية قدامي..
بغيت نسول هاد
الممرض لساني مقدرش ينطق..لساني تقييل..عرفني وحس بيا بللي باغي نهضر وقالي عادل غي
ارتاح راك بيخير..، يتبع..
الممرض هشام دندن
عن صفحة الامراض النفسية بالدارجة