adsense

2019/05/18 - 12:17 ص

...الغرفة رقم "8"..دخلت..واااو!..عالاااام!!..بيت فيه 2 نموسيات كل وحدة فقنت..وحدة فيها فراشو والمانطا ديالو ..ووحدة باينة مقادة مي باينة خاوية..واحد البيرو فالقنت عامر وراق وستيلوات..واللي بقا من البيت كامل عامر كتوبة..حيط كامل داير بحال شي خزانة د الكتب..خشب مركب فالحيط..باينة مصاوبة على قبلو..وملصقات فالحيط وشعارات وتصاور..منها د "ماو سيطونغ maw sitong"..منها د "شي غيفارا che guevara"..منها د "سطالين".."داروين"..تصاور اخرين د "المشاهب".. "ناس الغيوان".."ام كلثوم"..شفت فجيها لوخرى فيها لوحات فنية واعرة مكتوب ف لتحت ديالها "فاطمة الزهراء السليمي" بقيت كندور عيني فالبيت داكشي bien présenté ..بقيت غي حال فمي!..قلتلو واو هادا ماشي بيت هادي مكتبة!..واش نتا للي مرتب هادشي هنا؟..قالي نو!..كنحاول نرتب هادشي مرة مرة بوحدي ولكن الطبيعة د المرض ديالي مرة مرة كتغلب عليا..مكتخلينيش نبقا ديما مرتب..هاد الترتيب والتناسق للي كتشوف كتعاوني فيه واحد الممرضة معانا هنا ف السبيطار..سميتها "سعيدة"..من بعد وغادي تعرفها خصوصا ف تنظيم الحفلات للي كايديروها لينا هنا ف السبيطار.. والطابلوات واللوحات الفنية للي شفتي هادوك رسماتهوم "فاطمة الزهراء" حتى هي ممرضة مي خدمات ف مدينة اخرى..حتى هي فنانة..قلتلو واو هادشي رائع!!..ولكن بغيت نسولك..قالي تفضل..قلتلو شناهي الطبيعة ديال المرض ديالك للي مكتخليكش تكون منضم ومرتب..قالي انا كانو عندي اعراض بحال للي جاوك نتا..كنت كنسمع اصوات غريبة..كنشوف شي حاجات غراب..كنشم ريحة ماكيناش..نقدر نحس بللي شي حد قاسني فيدي ولا عنقي مي هادشي كامل مكينش فالواقع..وكنت كنحس باحساس غريب من جو صافي والسما صافية لرعض وبرق وعاصفة..هادشي كيتغير ف اجزاء من التانية..دابا الحالة ديالي مستقرة بالدوا..وبالعلاج النفسي..المرض ديالي سميتو "السكيزوفرينيا"..قلتلو اه!..وي!..انفصام ف الشخصية..كل مرة وكفاش كتكون الشخصية ديالك..كنشوفو بزاف ف الافلام..قالي نو!..راك غالط اولدي..المرض للي عندي مرض بوحدو..سميتو "مرض الفصام" ماشي الانفصام ف الشخصية..قالي بلاتي هانا جاي..مشا للخزانة دالكتب..وجابلي كتاب كبير..ديال الامراض النفسية..مكتوب فيه DSM 5..قالي هادا اخر ماكين ف البسيكياتري..هاد الكتاب جابولي الممرض "علي"..عارفني مبلي بالمطالعة والبحث..وجابولي كهدية من فرنسا..قلتلو واو كتاب مهم..حليت الكتاب كنقرا..مكنفهم والو..فيه كلمات صعاب..ديال التخصص..انا التخصص ديالي الهندسة التطبيقية..يعني لاعلاقة..وخا كان عندي مطالعة ف شوية د علم النفس..مي هادشي بووحدو..عالم اخر..قلبت على مرض السكيزوفرينيا..كنقرا..والو صعييب هادشي..قلتلو طارارا مافهمت حتى حاجة فهاد الكتاب جاني صعيب..ممكن تشرحلي المرض ديالك؟.. قالي سمع اولدي.. Schizophrenie هي...(بدا كيشرح..شوفو اول تعليق)..
قلتلو واو هادشي جديد عليا الصراحة..واستفدت منك بزاف اعمي طرارا.. اجي بعدا علاش سماوك طارارا..مالقاو غي هاد السمية هههه...بقا كيضحاااك ههههههههه...
..قالي من بعد وغادي نشرحلك جميع الامراض النفسية للي كاينة..قلتلو ميرسي..نضت من بلاصتي مشيت للخزانة..كنقلب ف الكتوبة..لقيت كتاب على شكل اوراق مكتوب فيها "مذكرات الحسين "..بغيت نهزو..حتى كنسمعو غوت قالي نو!! A ne pas toucher..تبدل فوجهو وتعصب..وجا حيدولي من يدي.. قلت مع راسي او!..ياكما بداوه الاعراض عاوتاني!؟..قالي شوف!..قرا اي كتاب بغيتي الا هاد الكتاب..!!..هاد الكتاب مكتوب فيه السيرة الداتية د حياتي من نهار خلاقيت حتى لدابا وانا عندي 68 سنة..ماعندش الحق لشي واحد يقراه..قلتلو سمحلي اعمي..ماسحابليش سميتك الحسين.. غي تهدن وارتاح..قالي اوكي..ماوقع باس!..قلتلو فوقاش غادي تخرج بحالك من السبيطار؟..قالي نتا باينة فيك فضولي ها!!..ولكن غادي نجاوبك..انا اولدي ساكن هنا..هادي هي داري..وهاد البيت هو العالم ديالي للي كلقا فيه راحتي بعيد على العالم المنافق للي على برا السبيطار..هنا لقيت الخير للي مالقيتوش ف عائلتي..هنا الراحة ديالي..هنا استافدت شحال من حاجة للي مالقاهاش على برا!!..كيهضر معايا بواحد الحرقة ويدو كيترعدو..وعينو كيتعزعو..
..من بعد ما شديت الدكتوراه ديالي ف علم الاجتماع..مرضت بمرض الفصام..مرضت بزاف اولدي..كيهضر وباقي يدو كيترعدو..تخلاو عليا العائلة ديالي كاملة..وكلاولي حقي ف الورت..ولاحوني هنا قبل ماتخلاق انتا اولدي..صعيب تمرض بمرض نفسي ف هاد البلاد..و ف هاد المجتمع المنافق للي كيبغي غي راسو..وكنضن ف العالم كامل..حيت المرض النفسي باقي" طابو Tabou"..سمعت منو هاد الهضرة وعيني غرغرو بالدموع..ارتبكت..ودارت بيا الدنيا..تفكرت راسي والحالة ديالي..حتى انا ممكن عمري نكون مهندس..وحتى انا ممكن يتخلاو علي عائلتي.."و اسراء"..ونبقا ديما هنا!!..وتنهدت.. شدلي فيدي وقالي انا عارفك علاش حزنتي دابا..خفتي تولي بحالي؟..قلتلو ها؟ ها؟ نو!..حاشا..انا يحصلي الشرف نولي انسان متقف بحالك!..بقا كيشوف فيا شوفات غارقين عامرين بالالم والحزن وابتسم ابتسامة خفيفة وعنقني..وقالي نسا عليك هادشي..تبع الدوا ديالك فاش تخرج وتبع النصائح..وغادي تبرا نهائيا..ومعمر هاد المرض يدور بيك مرة اخرى..اه!..وشوف!..وبعد من "الطبيسلة".. "هيييا"..هههه..قلتلو كفاش "هيييا "..قالي "الزطلة "الحشيش اصاحبي هههههه...بقينا كنضحكو ههههههههههه..قالي عاودلي على راسك..انا يالاه جيت نعاودلو و شي حد دق ف الباب..قالي هاد دقات ديال الممرضة "سعيدة" للي قلتلك..الدقات ديالها كنعرفهوم مزيان......يتبع...
إعداد هشام دندن عن صفحة الصحة النفسية بالدارجة