الممرضة
"سعيدة" الدقات ديالها كنعرفهوم مزيان..مخفيينش عليا..مشا فتحليها الباب..دخلات..باينة
ضريفة و النور فوجهها..قالتلو صباح الخير اعمي الحسين كي صبحتي؟ (مع راسي قلت..عجيب!..ماقاتلوش
"الطرارا"..)..جيت نقادلك البيت..ونشوفك واش محتاج شي حاجة..قالها نو..شكرا
ابنتي "سعيدة"..راه البيت باقي مرتب كما خليتيه البارح..تفضلي دخلي راه معايا
واحد الضيف..نعرفك بيه السي "عادل"..وهادي "سعيدة" الممرضة للي
مقابلا الجناح ديالي وهي للي مرتبة هادشي كما تاتشوف..وهي من ألطف الناس للي كاينة
هنا هي و"سمية" للي تاتكون معاها..قالتلي متشرفين..مرحبا بيك..راني قريت
فالدفتر د les consignes..بللي دخلتي ف الوحدة دالليل عند الممرض "خالد"..وبللي كنتي
فحالة هيجان..دابا كنشوفك صبحتي مزيان..قلتليها وي كنحس براسي وليت شوية واخا مرة مرة
كيجيوني شي افكار غراب وتهيئات.. دارت عند "طرارا " وقالتلو عجيب !وغريب!..كفاش
حتى سمحتي لشي حد من المرضى يدخل لبيتك؟!..نتا عندك هاد البيت مقدس وعزيز..وانا براسي
كتخليني ندخل غي نرتبو ونخرج..قالها انا براسي معرفتش كفاش حتى خليتو يدخل عندي!..ولكن
جاني انسان محبوب..وطالب وكيبغي الكتب..وكيفكرني ف ايام الشباب ديالي..والطموح للي
كان عندي وبغيت نعاونو..ودار عندي وقالي واخا راك فضولي..عندي عزيز..!..وواقلة غادي
نعطيك النموسية للي خاوية فالقنت وتونسني فهاد البيت..قالها وحاط يدو على كتفي..انا
فديك اللحضة جاني احساس زوين..ومكنتش كنتوقع أن كلمة زوينة فحقي قادرة باش دخل الفرحة
عليا..وتبدل المشاعر ديالي وتخليني نحس بالإجابية حسن من التأتير د الدوا!..قلت مع
راسي كفاش حتى دخلتلو فخاطرو بهاد السرعة وحتى هو دخلي فخاطري؟!..وحاجة اخرى حتى التعامل
ديال "سعيدة" معاه اعجبني..كفاش مقالتلوش "طرارا"..ودقات ف الباب
وخدات الإذن..!..حسيت بللي كاين احترام وتعامل وانسانية ف هاد السبيطار..على العكس
للي كنت كنسمع بللي كيتعاملو خايب..وكيضربو المرضى..واحد الشوية دقات ف الباب ممرضة
اخرى..كتعيط "سعيدة..سعيدة"..قالي طرارا هادي الممرضة" سمية"..حتى
هي ضريفة..جات كتقلب على "سعيدة"..كتعتبرها بحال اختها..متقدرش تخدم بلا
بيها وسعيدة كذلك..كما نتا متقدرش تبريباري بلا كارو و القهوة و "إسراء"
هههه..حتى هي كذلك ههه!..كتعطيها طاقة وحيوية..ديما واقفة بجنبها..نهار فاش سمعات بللي
"سعيدة" ممكن تنتاقل لسبيطار اخر حزنات وترونات..قلتلو واو!..عارف عليهوم
هادشي كامل!؟..قالي وي..راني قلتلك بللي هادي هي داري..وهادو هما عائلتي..بقيت كنشوف
ومستغرب!..قالتلي "سمية " مرحبا بيك السي "عادل"..قلتليها شكرا!..قالتلو
عمي "الحسين"..قالك "حميد الماجور" عطيه الكتاب ديال"كناوة
الأصول والإمتدادات أو المغرب الاسود"..راه محتاجو يقرا فيه شي شوية..وكنضن كيدير
شي بحث على تاريخ كناوة واقيلة..قالها مرحبا..مشا جابو من الخزانة وقاليها قول لحميد
يتهالا ف هاد الكتاب..هادا راه هدية من عند
صاحبي "سيرج خوفي" اليهودي المغربي للي عايش ف مدينة الصويرة..كان جا عندي
زيارة وجابولي..دار عندي با "الحسين" وقالي حتى أنا عندي ميولات تراثية كناوية..قلتلو
واو!..وكفاش الماجور حتى هو كناوي؟..قالي وي..كناوي حتى النخاع..هههه..قالي من بعد
وتعرفو..وحتى ديك "الهجهوج "للي كتشوف معلق فالحيط حتى هو جابولي اليهودي،من
بعد وتعرف حتى على الفرقة الموسيقية كاملة للي كاينة هنا ف السبيطار..قلتلو واو كاينة
فرقة هنا؟..قالي وي..والاعضاء ديالها كاملين ممرضين..وكل واحد وشنو كيعزف..مواهب كتيرة
كاينة فهاد السبيطار..قلتلو واو عجيب !..قلتلو حتى انا عندي "كيتار " فالدار..كنعزف
كهواية فوقت الفراغ مع صحابي فالكلية..قالي ادن مزيان مغاديش تقنط هنا..غادي نعرفك
على الفرقة و الغرفة ديالهوم للي كاينة حدا الغرفة ديالي.." الغرفة رقم
10" اللي فيها الالات الموسيقية..وكيدربو
فيها مرة مرة..قتلو هادشي مشوق الصراحة..خرجنا من البيت د با "الحسين"..شافت
فيا "سعيدة"وقالتلي كنشوف الشعر دراسك كبير ومخربق..اجي معايا نديك لقاعة
الحلاقة تحسسن..قلتليها اوكي!..مشيت معاها دخلنا..كلقا راجل طويل وقرع..قالتلي نعرفك
بالسيد للي غادي يحسنلك..هادا السي "مصطفى"..قتلو متشرفين..قالتلي هادي ماشي
الخدمة ديالو ولكن كيتطوع و كيحسن للمرضى كاملين..وكيدير مجهود كبير..كندور عيني فالقاعة
كنشوف مرايات كبار و الات خاصة بالحلاقة و بلاصة ديال غسيل الشعر..وكاين منتوجات ديال
التجميل وماكياجات..داكشي رائع، سولت "مصطفى" قالي هادو خاصين بالمريضات..للي
كنجيبولهوم كوافورات من على برا فإطار جمعوي..وحتى هاد اللوازم ولآلات للي كتشوف مكلفة
بيهم الجمعية ديالنا.. هي للي كتوفر هادشي..وكدير مجهود كبير..بقيت ساكت..ومدهوش..كانت
عندي فكرة غالطة على مستشفيات الطب النفسي..قالي خود راحتك ابا "عادل"..غادي
نديرلك حسانة واعرة د يال الوقت..كون هاني داكشي بروفيسيونيل ههههه...بقا كيحسنلي..بقينا
كندردشو.. جبدنا الهدرة على الموسيقى و"الكيتار" قالي انا للي كنعزف العود
مع الفرقة الموسيقية......يتبع..
ب.س 1: اي تشابه
للشخصيات الوهمية مع شخصيات حقيقية في اي مستشفى سيكون فقط محض الصدفة
ب.س2: الفرقة الموسيقية
حقيقية
إعداد هشام دندن عن صفحة الصحة النفسية
بالدارجة