adsense

2019/05/16 - 10:59 م


...عندو خبرة كبيرة وكنعيطولو "الملالي"..من بعد ونعاودلك عليه..قولي بعدا أولدي ! كي بقيتي دابا؟ شوية؟..البارح كنت حاضر فاش دخلتي..كنتي فحالة هيجان حاد..قالهالي بالفرونسي " قالي كنتي "très agité"..فديك اللحضة هو باقي كيهضر وانا درباتلي فراسي "طن"..آوو!!..السيد كيبان قاري!..وكيهدر معايا متبت..آش كيدير هنا؟؟.!..أنا باقي كنسول راسي.. وهو يقولي سمع اولدي..غادي يشوفك الطبيب قريب..وغالبا التشخيص للي غادي يخرج بيه معاك..هو تقدر تكون عندك "une BDA"..بقيت كنشوف فيه..مافهمت والو..قلت مع راسي اش كيخربق هادا؟!..ياكما حتى هاد الهضرة للي كنسمع منو حتى هي غي تهيئات؟..هادا مامتبت والو!..قلتلو كفاش "BDA"؟..قالي Une"
bouffée délirante aigue"
هي حالة الهيجان الحاد للي كانت جاتك البارح..ماتخافش  اولدي..هادي حالة كتبان دغية وكتمشي دغية..قلت مع راسي السيد كيبان قاري..ولكن واش هاد الهدرة للي تيقولي صحيحة؟؟ ولا مريض مسكين كيخربق..ولا تهيئات عاوتاني؟! ..كفاش" BDA " وتخربيق!!..هادا ماسماوه طرارا حتى كان vraiment طرارا
لقيت يد شداتلي فكتفي..درت لقيت 3 دالممرضين ولد و 2 بنات باينين صغار فالعمر..قالولي السي عادل حنا ممرضين متدربين stagiaires..جينا باش تمشي معانا عند الطبيب يشوفك..نعرفوك براسنا انا سميتي "أيوب"..هادي "وداد"..وهادي "هاجر".. وانت؟ قلتلهوم انا سميتي "عادل"..قالولي متشرفين..نضت من الكرسي وقلت ل "طرارا"..حتى نتشاوفو اعمي..بقيت غادي او انا كندور مورايا كنشوف الطرارا ومستغرب لداكشي للي قال!..بقينا غاديين فديك الجردة..وانا خايف من المرضى..وباقي مامستوعبش عاد العالم..دخلنا ف ساحة اخرى..فيها ملعب د كرة القدم..وملعب د الباسكيط..كنشوف شي وحدين كايبانو نقيين كيلعبو..وكيعيطو أيوووب!..وداااد!..هاجاااار!...اجيو لعبو معانا...وحداهوم مقهى صغيرة كالسين فيها مرضى اخرين..وممرضين واطباء..عالام اخر هنا!...بقيت غادي او انا  كنتفرج شوية فالكورة..قالولي سطاجيير ياكما باغي تلعب كورة هه؟ قلتلهوم مكرهتش مي دابا باقي مسخسخ..قالولي من بعد ولعبو مع بعضياتنا..مشينا لجناح آخر..مكتوب فيه جناح "C"..تما كاينين البيروات د الاطباء..كلست فكرسي قاعة الانتضار..لافتة فوق الباب مكتوب فيها.. الدكتور "مطيع"..قالولي اجي ندخلو راه كيتسناك انت اللول..
دخلت عند الطبيب..هدر معايا..عاوتلو كولشي..فوقاش بداوني هاد الاعراض..شحال د المدة وانا مبلي بالحشيش..عاوتلو التفاصيل كاملة..شرحلي كولشي..خرجلي الدوا..قالي غادي تبقا معانا هنا فالسبيطار واحد المدة ماشي طويلة حتى تستقر وتحسن الحالة ديالك..هو باقي كيهدر وانا بديت كنتخيل شي حوايج كيقتلو بالضحك..ههههه بقيت كنضحك بوحدي..كنضحك كنضحك.ههههههههههه...والعاداااو..ههههههه... واخا انا المشاعر ديالي ماشي د الضحك..والموقف للي انا فيه ماشي ديال الضحك..مي مقدرتش نسيطر على نفسي..تما سمعت واحد الكلمة دازت فالسما..قالها الطبيب قال "BDA"..جا فبالي الطرارا..خرجنا من البيرو..تلاقاني الممرض للي كان معايا فالصباح..قالي واش تبغي تمشي لبيتك ولا تمشي للجردة..قتلو بغيت نمشي للجردة ضروري..قتلو بغيت نسولك 2 أسئلة الى كان ممكن.. قالي تفضل..قتلو السؤال الأول هو شناهي BDA ؟ والسؤال التاني هو داك السيد الشباني طرارا..شكون هو؟؟..بقا كيضحاك ههه..قالي طرارا هو الفيلسوف و المتقف د المرضى هنا فسبيطار ههه..خليه هو اللخر ونعاودلك عليه...قالي ياكما هو للي قالك BDA..وجابها لاسقة ياك؟ ههه.. زدق نفس التشخيص للي قالك الطبيب؟ ههه... قلتلو وي!.. قالي اوكي ههه انا غادي نشرحلك ونحاول نبسطلك سمع اسيدي BDA هي: ...(بدا كيشرح..شوفو اول تعليق)
من بعد ماشرحلي الحالة للي انا فيها..عرفت بللي انا مريض حاليا..دارت بيا الدنيا..مي خصني نتعايش مع المرض ديالي ونتقبلو..ونكون ديما قوي..ونتبع الدوا ديالي..باش ماترجعليش هاد الحالة مرة اخرى..وباش ماتطورش الامور ونولي حتى انا حمق!! اوو شيت!! مكنبغيش نسمع هاد الكلمة!!
..بقيت ساهي..حتى سمعت الممرض كيعاودلي على الطرارا..قالي هاداك السيد تيقولو بللي عندو دوكتراه ف علم الاجتماع..وراه الضروف للي خلاتو يكون هنا..حنا ماعمرنا شفنا الشهادة ديالو بعينينا مي هادشي للي تيقول وتيقولوها حتى الناس القدام د المدينة..هو انسان مثقف كيقرا ف جميع المجالات..حتى ف علم النفس..الشي للي خلاه يلقى تقدير واحترام من عند الموظفين وحتى من عند المرضى..قلتلو راه باينة السيد قاري..ولكن اشمن ضروف للي خلاتو يكون هنا..؟؟..قالي هاد السؤال غادي نخليه هو يجاوبك عليه..انا دابا عندي الشغل مع مرضى اخرين..غادي نمشي نكملو..وانت كلس مع راسك فالجردة او لعب كورة..وهو يعيطلو طارارا! طارارا!..اجي كلس ونس السي "عادل"..كلس حدايا بقيت كنعاودلو على راسي وعلى قرايتي..قالي واش كيعجبك تقرا الكتوبة؟..قلتلو وي بزاف.. قالي اجي معايا..داني لبيتو الغرفة رقم "8"...دخلت..وااااو..عالااااام.......يتبع...
إعداد هشام دندن عن صفحة الصحة النفسية بالدارجة